Vellos con Historia

EMBARAZO, PARTO, E CRIANZA
Ás cochas, cando parían, dábaselles carvés (malas herbas que naces nos prados) cocidos.
MAD (Pousada, A Pastoriza)

Cando as porcas parían dábanlles para tomar unha herba chamada madre para que non tiveran problemas para criar os porcos.
PVJ (Vilar de Mouros, Meira)

Se unha cocha, tras o parto, quedaba mal, por non comer ou non ter abondo leite, había que darlle a herba da madre, que había nalgúns campos. Collíase unha presada dela, cocíase en auga, e botábaselle na comida á cocha.
ELF (Meira)

Se paría unha cocha, para limpala, facíaselle sustancia dun uño de cocho, e despois, daquela auga, facíanselle sopas de pan.
IPP (Martín, Baleira)

Para que as cochas ouriñaran despois de parir mesturábaselles coa comida unha planta chamada herba borraxe.
ARP (Meira)

RELACIONADOS COA TEMPERATURA
Ás cochas que non quecían, dábaselles dúas ou tres cuncas diarias de avea.
MAD (Pousada, A Pastoriza)

Para facer que as ranchas queceran, había que darlles beladoce con trigo quente.
AGR (Vilariño, Muimenta, Castro de Rei)