Vellos con Historia

As hernias das vacas tratábanse cunha faixa de sacos que se lles poñían no lombo e curaban.
IGL (A Pastoriza)

Se lle inchaban as pernas untábanselles con pingo sen sal, que se facía na matanza a propósito para iso.
IAV (Miñoto, A Pastoriza)

Cando unha vaca tiña nunha perna un vulto empregaban panos quentes con vinagre.
Para os inchazóns das pernas das vacas, parches de ouriños de nenos pequenos.
JFF (Hermunde, Pol)

Cando unha vaca tiña un vulto nunha pata, meu avó mollaba un trapo en vinagre e dáballe fregas diariamente sobre aquel, ata que lle pasaba.
Contra as feridas nas patas, había quen dicía que era ben ouriñarlles nelas.
YLA (A Muíña, Retizós, Baleira)

Se tiñan verrugas na boca, había que ir polos prados, buscando rás, para envolvelas nunha verza e darllas a comer.
IPP (Martín, Baleira)